जनकपुर, फागुन २२
सिरहामा प्रेम गरेर भर्खरै विवाह गरेका एक यूवकले श्रीमतिको महिना दिन नवित्दै हत्या गरेको छ । उनी हत्या आरोपमा अहिले सिरहा प्रहरी हिरासतमा छन् ।
सामाजिक सञ्जाल फेसबुकबाट यूवक र यूवतीको प्रेम भएको थियो । प्रेममा परेपछि गुपचुपरुपमा दुवैले आ–आफ्ना परिवारजनलाई जानकारी नै नगराई मन्दिरमा विवाह समेत गरे । पछि यूवकको परिवारले विवाहका लागि अर्कै केटी खोजी दिएपछि प्रेमिकाको हत्या गरेको घटना सिरहा प्रहरीले सार्वजनिक गरेको छ ।
सिरहाको कर्जन्हा नगरपालिका वडा नम्बर ७ बस्ने २३ वर्षीय अमर राउतले २२ वर्षीया श्रीमती पुजा सिंह भनिने पुजा कुमारी पोदारको हत्या गरेको सिरहाका प्रहरी प्रवक्ता समेत रहेका प्रहरी नायव उपरीक्षक सुभाष बुढाथोकीले जानकारी दिए ।
गत मंगलवार कर्जन्हा नगरपालिका वडा नम्बर ७ स्थित कमला नदि किनारको काँसघारीमा काठमाडौँ जिल्लाको काठमाडौँ महानगरपालिका वडा नम्बर २० स्थित जैशिदेवलकी २२ वर्षीया पुजाको शव फेला परेको थियो । सो घटनाको अनुसन्धानको क्रममा मृतककी श्रीमान अमरलाई शुक्रबार पक्राउ गरिएको प्रहरी प्रवक्ता बुढाथोकीले बताए ।
वैदेशिक रोजगारीको क्रममा कतारमा रहेको समय अमरले पुजासँग प्रेममा परेको थियो । सामाजिक सञ्जालमा चिनजान भई एक वर्षदेखि नियमित सम्पर्कमा रहेका अमर माघ १३ मा नेपाल स्थित घर फर्केपछि २७ मा काठमाडौंको भद्रकाली मन्दिरमा विवाह गरेको बयानको क्रममा आरोपित अमरले प्रहरीलाई भनेका छन् । विवाह गरेर दुवैजना काठमाडौं बाफलमा कोठा भाडामा लिई बस्दै आएका थिए ।
प्रेमीकासंग विवाह गरेर अमरले आफ्नो घरमा कुराकानी गर्दा घरपरिवारले नस्विकारेपछि घरपरिवारलाई मनाउन घर आएका थिए ।
तर घर आएपछि उनी फर्केनन् । त्यसपछि पुजा फागुन १६ मा अमरलाई खोज्दै जाँदा सिरहाको बस्तिपुर चोक पुगेर प्रेमी अमरलाई फोन गर्दै लिन आउन भनेपछि उनले आफु बाहिर रहेकाले साँझसम्म घर आउने बताएका थिए ।
अमरले पुजा आफुलाई खोज्दा खोज्दै आएपछि आफ्नो साथीसँग सल्लाह गरेर हत्याको योजना बनाई बस्तिुपुर चोकमा पुगेर अमरले घर लैजाने बहानामा कमला नदिको किनारमा एकान्त स्थलमा लगि साथीहरुसँग मिलेर पुजाको घाँटी थिचेर हत्या गरेको प्रहरी अनुसन्धानबाट खुलेको सिरहाका प्रहरी प्रवक्ता बुढाथोकीले बताए ।
सामाजिक सञ्जालमा प्रेममा परेर विवाह गरेका युवकले घर परिवारलाई मनाउन आएकोमा अमरकै सहमतीमा असन्तुष्ट परिवारले धनुषाकी युवतीसँग अर्को विवाहका लागि लगनगाँठो तय गरेको थियो । तर पुजा अचानक आएपछि विवाहमा असर पर्ने देखेर अमरले साथीहरुसँग मिलेर उनको हत्या गरेको उनले बताए ।
यस घटनामा आरोपित अमर पक्राउ परेपनि अन्य संलग्न व्यक्तिहरु भने फरार छन् । फरारहरुको अभियूक्तहरुको खोजी कार्य जारी रहेको सिरहा प्रहरीले बताएको छ ।
