बारा, चैत्र १२
एक महिलालाई एसिड प्रहार गरेको आरोपमा जेठाजु र ससुरालाई पक्राउ प्रहरीले पक्राउ गरेका छन् ।
पर्साको वीरगंज महानगरापालिका १३ बस्ने सीता पटेलमाथि शुक्रबार राति एसिड प्रहार गरेको थियो । उमेश साहकी श्रीमती २८ वर्षीया पटेल बाराको कलैयास्थित माइतीघर आउने क्रममा मोटरसाइकलमा आएका दुई जनाले एसिड प्रहार गरेका हुन् ।
बारा प्रहरीका अनुसार एसिड प्रहार भएको भन्ने सूचना प्राप्त हुनसाथ तत्काल प्रहरी टोली खटी गई घाइते पटेललाई उपचारको लागि प्रादेशिक अस्पताल कलैयामा पठाइएको थियो ।
सो अस्पतालबाट उनलाई थप उपचारको लागि नारायणी उपक्षेत्रीय अस्पताल वीरगंजमा लगेको प्रहरीले जनाएको छ ।
पीडितले उक्त घटनामा जेठाजु वीरगंजको श्रीपुर बस्ने ३२ वर्षीय रामबाबु साह र ससुरा ५० वर्षीय हवारी साह संलग्न रहेको बयान दिएकी छन् ।
आरोपित दुवैलाई वीरगंजबाट नियन्त्रणमा लिई थप अनुसन्धान भइरहेको प्रवक्ता प्रहरी नायब उपरीक्षक राजेश थापाले जानकारी दिए ।
