जनकपुर, चैत २८ ।
जनकपुर टि २० क्रिकेट प्रतियोगिता अन्तर्गत सोमबार भएको अलग अलग खेलमा जलेश्वर क्रिकेट टिम र मधुवनी क्रिकेट टिम विजयी भएको छ ।
पहिलो खेलमा जलेश्वर क्रिकेट टिमले ओमकार क्रिकेट टिमलाई ८ विकेटले पराजित गरेको छ । ओमकारले दिएको ९७ रनको लक्ष्य जलेश्वरले १३ ओभर ५ बलमा मात्र २ विकेटको क्षतिमा पूरा गरेको हो । जलेश्वरका लागि हरेकृष्ण झा ३७ र श्रवण नागवंशीले ३५ रनको योगदान गरे ।
ओमकारको बलिंगमा निशान्त रविले २ विकेट लिएका थिए । पहिलो ब्याटिंग गरेको ओमकारले निर्धारित २० ओभरमा ७ विकेटको क्षतिमा ९६ रनको स्कोर खडा गरेको थियो । उसका लागि रामप्रकाश र रंजित यादवले १९÷१९ रनको योगदान गरेका थिए ।
सोमबार भएको दोस्रो खेलमा मधुवनी क्रिकेट टिमले धमौरा क्रिकेट टिमलाई ६ विकेटले पराजित गरेको छ । धमौराले दिएको १३२ रनको लक्ष्य मधुवनीले ४ विकेट गुमाउँदै १७ ओभरमा पूरा गरेको थियो । मधुवनीका लागि मयंक अग्रवाल ४३ र केशव कुमारले ४२ रनको योगदान गरे ।
यस अघि ब्याटिंग गरेको धमौराका लागि अतुल्य प्रियंकारले ५१ रनको अर्धशतकीय पारी खेले पनि टिमले ठूलो स्कोर खडा गर्न सकेन् । धमौरा ९ विकेटको क्षतिमा निर्धारित २० ओभरमा १ सय ३१ रन बनाउन सफल भएको थियो ।
