काठमाण्डौं, बैशाख ११
सप्तरीको राजगढ गाउँपालिका–५ मलेकपुरस्थित सडकमा प्र.१–०२४१ प २२९६ नम्बरको मोटरसाइकल र प्र.१–०२०४१ प ९५२४ नम्बरको मोटरसाइकल एकआपसमा ठक्कर खाई गए राति दुर्घटना हुँदा दुवै मोटरसाइकल सवार ३ जनाको मृत्यु भएको छ ।
मृत्यु हुनेहरूमा हनुमाननगर कंकालिनी नगरपालिका–३ बस्ने ३० वर्षीय पप्पु यादव, सोही ठाउँ बस्ने २६ वर्षीय सन्दीप यादव र २८ वर्षीय बुच्चु भन्ने रंजित यादव रहेका छन् । दुर्घटनामा गम्भीर घाइते भएका उनीहरूको गजेन्द्र नारायण सिंह अस्पताल राजविराजमा उपचारको क्रममा मृत्यु भएको हो ।
यता मोरङको पथरी शनिश्चरे नगरपालिका–३ आइतबारेस्थित सडकमा को.२ त २८३२ नम्बरको ट्याक्टरको ठक्करबाट पैदलयात्री रतुवामाई नगरपालिका–२ ईटहरा बस्ने ४२ वर्षीय दिनेश भण्डारीको शुक्रबार राति मृत्यु भएको छ ।
ठक्करबाट गम्भीर घाइते भएका उनको मदन भण्डारी अस्पताल हुँदै ट्रमा सेन्टर मंगलवारे उर्लावारीमा थप उपचारको क्रममा मृत्यु भएको हो ।
ट्याक्टर चालकलाई प्रहरीले नियन्त्रणमा लिएको छ ।त्यस्तै दैलेखको आठबिस नगरपालिका–९ पत्थर गाडे भन्ने स्थानमा क.प्र.२–०३–००१ त ४९५९ नम्बरको ट्याक्टरबाट खसेर ट्याक्टरको चक्काले किच्दा सोही ठाउँ बस्ने बल बहादुर बिकको छोरा १३ वर्षीय तपेन्द्रबहादुर बिकको शनिबार बिहान मृत्यु भएको छ ।
दुर्घटनामा गम्भीर घाइते भएका उनको उपचारको लागि स्थानीय मेडिकलतर्फ लैजाने क्रममा बाटोमै मृत्यु भएको हो । हाल फरार ट्याक्टर चालकको प्रहरीले खोजी गरिरहेको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
