जनकपुर, बैशाख १६
यही बैशाख ३० हुने स्थानीय तहको निर्वाचनको क्रममा भएको दावी विरोध तथा उम्मेदवारी फिर्ताको क्रममा धनुषामा मात्रै १ सय भन्दा बढी उम्मेदवारले उम्मेदवारी फिर्ता लिएका छन् ।
धनुषा जिल्लाभरिमा मात्रै १ सय ९ जना उम्मेदवारले उम्मेदवारी फिर्ता लिएका हुन् ।
१८ वटा स्थानीय तह रहेकोमा धनुषामा पालिका मेयर, अध्यक्ष, उपाध्यक्ष, वडाअध्यक्ष र सदस्यहरु गरी १ सय ९ जनाले उम्मेदवारी फिर्ता लिएको जिल्ला निर्वाचन कार्यालय धनुषाले जनाएको छ ।
धनुषामा एक उपमहानगरपालिका, ११ वटा नगरपालिका र ६ वटा गाउँपालिका रहेकोमा उम्मेदवारी दिनेहरुमध्ये उपमहानगरका दुई जना मेयर, नगरपालिकाका दुई मेयर र गाउँपालिकाका एक जना अध्यक्ष पदका उम्मेदवार सहित १ सय ९ जनाले उम्मेदवारी फिर्ता लिएका छन् ।
जनकपुरधाममा उम्मेदवारी दिएकाहरुमध्ये मेयर पदका दुई जना सहित १५ जनाले उम्मेदवारी फिर्ता लिएका छन् ।
यहाँ मेयर पदमा उम्मेदवारी दिएका बैधनाथ साह, नन्दकुमार भगत, उपमेयर पदका उम्मेदवार विश्वनाथ साह सुडी र ११ जना वडाअध्यक्ष र एक सदस्य पदमा उम्मेदवारी फिर्ता भएको मुख्य निर्वाचन अधिकृत ब्रजेश प्याकुरेलले जानकारी दिए ।
मिथिला नगरपालिकामा दुई जना मेयरका उम्मेदवार सहित ११ जनाले उम्मेदवारी फिर्ता लिएको निर्वाचन अधिकृत दिपक धितालले बताए । उनले मेयरमा नेकपा एमालेबाट बागी भएर उम्मेदवारी दिएका निवर्तमान मेयर हरिनारायण महतो र जनता समाजवादी पार्टीबाट उम्मेदवारी दिएका चन्देश्वर महतोले उम्मेदवारी फिर्ता लिएको बताए । त्यस्तै वडाअध्यक्ष पदका ५ र वडा सदस्य पदका ४ जनाले उम्मेदवारी फिर्ता लिएको निर्वाचन अधिकृत धितालले बताए ।
त्यस्तै धनुषाधाममा एक उपप्रमुख पदका उम्मेदवार सहित ७ जनाले उम्मेदवारी फिर्ता लिएको निर्वाचन अधिकृत चिरञ्जिवी गौतमले बताए । उनले लोकतान्त्रिक समाजवादी पार्टी नेपालबाट उपमेयर पदमा उम्मेदवारी दिएकी मेनका कुमारी सिंहले उम्मेदवारी फिर्ता लिएकी छन् । त्यस्तै वडाअध्यक्षका २ जना र सदस्य पदका ४ जनाले उम्मेदवारी फिर्ता लिएका छन् ।
त्यस्तै बटेश्वर गाउँपालिकामा एक गाउँपालिका अध्यक्षका उम्मेदवार सहित ३ जनाले उम्मेदवारी फिर्ता लिएको निर्वाचन अधिकृत उद्धव ढोडारीले बताए । बटेश्वरमा अध्यक्ष पदका उम्मेदवार खलेन्द्र बहादुर कटुवालले उम्मेदवारी फिर्ता लिएका छन् । त्यस्तै वडाअध्यक्षका १ जना र दलित महिला सदस्य पदका एक जना उम्मेदवारले उम्मेदवारी फिर्ता लिएको उनले बताए ।
त्यस्तै धनौजी गाउँपालिकामा समेत एक गाउँपालिकाका अध्यक्ष पदका उम्मेदवार सहित ३ जनाले उम्मेदवारी फिर्ता लिएको निर्वाचन अधिकृत पोषराज खनालले बताए । उनले अध्यक्ष पदका उम्मेदवार लक्ष्मण मण्डल र दुईजना वडाअध्यक्ष पदका उम्मेदवारले उम्मेदवारी फिर्ता लिएका हुन् ।
त्यस्तै विदेह नगरपालिकामा ५ जनाले उम्मेदवारी फिर्ता लिएको निर्वाचन अधिकृत अनुज भण्डारीले जानकारी दिए । विदेहमा वडाअध्यक्ष पदका २ र महिला सदस्य पदका ३ जनाले उम्मेदवारी फिर्ता लिएकी छन् ।
त्यस्तै हंसपुर नगरपालिकामा एकजना सदस्य र एक दलित सदस्य सहित दुईजनाले उम्मेदवारी फिर्ता लिएको जनाइएको छ ।
त्यसैगरी सबैला नगरपालिकामा ६ जना वडाअध्यक्ष र एक वडा सदस्य पदका उम्मेदवार सहित ७ जनाले उम्मेदवारी फिर्ता लिएको निर्वाचन अधिकृत बासुदेव पाण्डेले बताए ।
त्यस्तै क्षीरेश्वरनाथ नगरपालिकामा वडाध्यक्ष पदका ३, सदस्य ४, दलित महिला सदस्य २ र महिला सदस्य १ गरि १० जनाले उम्मेदवारी फिर्ता लिएको जनाइएको छ ।
त्यस्तै शहिदनगर नगरपालिकामा ७ जनाले उम्मेदवारी फिर्ता लिएका छन् । शहिदनगर नगरपालिकामा वडाअध्यक्ष पदका १, सदस्य २, दलित सदस्य २ र महिला सदस्य २ जनाले उम्मेदवारी फिर्ता लिएको निर्वाचन अधिकृत उत्तम प्रसाद खरेलले बताए ।
त्यस्तै नगराईन नगरपालिकामा १४ जनाले उम्मेदवारी फिर्ता लिएको निर्वाचन अधिकृत सुदीप कुमार दंगालले बताए । उनले वडाअध्यक्ष पदका ४, सदस्य ७ र महिला सदस्य पदका ३ जनाले उम्मेदवारी फिर्ता लिएको बताए ।
त्यस्तै मिथिला विहारी र कमला नगरपालिकामा वडाध्यक्ष पदका एक\एक जनाले उम्मेदवारी फिर्ता लिएका छन् । गणेशमान चारनाथ नगरपालिकामा भने ३ जनाले उम्मेदवारी फिर्ता लिएका छन् ।
त्यसैगरी मुखियापट्टी मुसहरनियाँ गाउँपालिकामा ३ जना, औरही गाउँपालिकामा ३ वडाअध्यक्ष सहित ७ जना, लक्ष्मिनियाँ गाउँपालिकामा ८ जना र जनकनन्दनी गाउँपालिकामा २ जनाले उम्मेदवारी फिर्ता लिएको जिल्ला निर्वाचन कार्यालय धनुषाले छ ।
मिथिला नगरपालिका मेयरमा बागी बनेर उम्मेदवारी दिएका निर्वतमान मेयर हरिनारायण महतोले पनि पार्टीको दबावमा उम्मेदवारी फिर्ता लिएका छन् ।
एमाले नेताहरूका अनुसार उनलाई प्रदेश सभा सदस्यमा हरिनारायण महतोलाई टिकट दिने तयारी रहेको छ । उनले एमाले पार्टी परित्यागको घोषणा गर्दै स्वतन्त्र उम्मेदवारी घोषणा गरेका थिए ।
