पर्सा, बैशाख १८
पर्सामा मोटरसाइकल सहित तीनजना चोरीको आरोपमा पक्राउ परेका छन् ।
पक्राउ पर्नेमा पर्साको वीरगञ्ज महानगरपालिका वडा नम्बर १० स्थित रानीघाटका १८ वर्षीय कुन्दन साह, रौतहटको राजदेवी नगरपालिका वडा नम्बर ७ का १८ वर्षीय रक्की भन्ने राहुल सिंह र पर्साको ठोरी गाउँपालिका वडा नम्बर १ का २५ वर्षीय निरज सुनुवार रहेको जिल्ला प्रहरी कार्यालय पर्साले जनाएको छ ।
वीरगञ्ज महानगरपालिका वडा नम्बर ५ स्थित कुम्हाल टोल बस्ने ६२ वर्षीय हिमाल गौतमको ना ६४ प ९६०० नम्बरको मोटरसाईकल शनिवार राति ११ बजे आफ्नै घर अगाडि पार्किङ गरी राखिएको अवस्थामा चोरी भएपछि प्रहरीलाई खबर गरेका थिए ।
त्यसपश्चात प्रहरीले चोरी भएको मोटरसाइकल सहित २ जनालाई भाग्दै गरेको अवस्थामा नियन्त्रणमा लिएका थिए ।
यस्तै शनिवार साँझ ठोरी-१ का ४० वर्षीय शिवशंकर मण्डलको मोटरसाइकल घर अगाडि पार्किङ गरी राखिएको अवस्थाबाट लक तोडी चोरी भएको थियो ।
पर्सा प्रहरीले चोरी भएको खबर पाएपश्चात मोटरसाइकल निरज सुनुवारको घरमा त्रिपाल र प्लाष्टिकले लुकाइछिपाई राखिएको अवस्थाबाट बरामद गरेको जिल्ला प्रहरी कार्यालय पर्साले जनाएको छ ।
यता पर्सा प्रहरीले भने यस सम्बन्धी थप अनुसन्धान भइरहेको जनाएका छन् ।
