जनकपुर, बैशाख २७
स्वतन्त्र उम्मेदवार बलराम महतोले आफ्नो घरदैलो अभियानसमापन गरेसँगै मौन अवधिको पूर्वसन्ध्यामा शक्ति प्रदर्शन गरेका छन् ।
मंगलबार दलहरुले गाजा बाजाका साथ भव्य रैली निकालेका थिए । नाच गानका साथै निस्केको रैलीको माध्यमले उम्मेदवारहरुले मतदाताहरुलाई रिझाउने प्रयास गरेका थिए । दलहरुको रैलीमा हजारौको संख्यामा समर्थकहरुको सहभागिता रहेको थियो ।
त्यसै क्रममा स्वतन्त्र उम्मेदवार बलराम महतोको शक्ति प्रदर्शनमा समेत उल्लेख्य संख्यामा समर्थकहरुको भीड देखिएको थियो । उनले पनि आफ्ना समर्थक सहित नगरभरी परिक्रमा गरेका थिए । आफ्नो हरेक मन्तव्य जस्तै उनले फेरी आफूले जनकपुरधामवासीलाई निस्वार्थ भावमा काम गर्ने प्रतिवद्धता व्यक्त गरेका छन् ।
उनले आफूले निर्माण व्यवसायीको रुपमा गरेका कामहरुमा उपमहानगरले वैमनस्यता देखाएका कारण दुर्दशा भएको भन्दै त्यसलाई सुधार गर्नका लागि आफूलाई चुन्न फेरी अपिल गरे ।
आफूलाई भौतिक संरचना निर्माण कार्यको अनुभव रहेकाले यस क्षेत्रमा राम्रो काम गर्ने दावी गरे । यसका साथै अन्य क्षेत्रको विकासका लागि विज्ञहरुको सल्लाह अनुसार काम गर्ने बताए ।
