जनकपुर, बैशाख २७
मौन अवधी शुरु हुनुभन्दा अगावै दलहरुले जनकपुरधाममा आफ्नो शक्ति प्रदर्शन गरेका छन् । मौन अवधी शुरु भएपछि चुनावी प्रचार प्रसार गर्न नसक्ने भएकोले अन्तिम दिन आफ्नो सम्पूर्ण शक्ति दलहरुले प्रचार प्रसारमै समय खर्चेका थिए ।
मंगलबार दलहरुले गाजा बाजाका साथ भव्य रैली निकालेका थिए । नाच गानका साथै निस्केको रैलीको माध्यमले उम्मेदवारहरुले मतदाताहरुलाई रिझाउने प्रयास गरेका थिए । दलहरुको रैलीमा हजारौको संख्यामा समर्थकहरुको सहभागिता रहेको थियो ।
नेकपा एमालेको निस्केको रैली नगरको विभिन्न भागको परिक्रमा गरेको थियो । रैलीमा समर्थकहरु गाडी, मोटर साइकल तथा पैदल यात्रा गरी सहभागीता जनाएका थिए । महिला नेतृहरुको पनि उल्लेख्य सहभागिता रहेको थियो ।
रैलीमा नेकपा एमालेबाट जनकपुरधाम उपमहानगरपालिकाको नगरप्रमुखको उम्मेदवार शिवशंकर साह हिरा, एमालेका सचिव
रघुवीर महासेठ, पूर्व मन्त्री जुलीकुमारी महतो लगायतका नेताहरुको पैदल सहभागी भएका थिए ।
एमालेको रैलीमा समर्थकहरुको भीड भव्य रुपमा देखिएको थियो । सो रैलीको कोणसभामा बोल्दै नगरप्रमुख पदका उम्मेदवार शिवशंकर साह हिरा आफू जनकपुरधामलाई भ्रष्टाचारमुक्त बनाउन दृढ संकल्पित रहेको बताए ।
एमालेको नेतृत्वमा सरकार हुँदा जनकपुरधाम लगायत लगायत मधेशको विकासमा उल्लेख्य योगदान गरेको उनको दावी थियो ।
