जलेश्वर, कार्तिक २४
तराई मधेश लोकतान्त्रिक पार्टीका अध्यक्ष वृषेशचन्द्र लालले नयाँ जेनेरसनका यूवाहरुलाई राजनीतिक नेतृत्वमा आउनका लागि आह्वान गरेका छन् ।
बिहीबार महोत्तरी– ३ मा मतदातासँग भेटघाट गर्दै उनले नयाँ विभिन्न गठबन्धनका नाममा नयाँ जेनेरेसनलाई राजनीतिक नेतृत्वमा प्रवेश गर्नबाट रोक्ने षड्यन्त्र गरेको आरोप समेत लगाए ।
महोत्तरीको निर्वाचन क्षेत्र नम्बर–३ बाट प्रतिनिधिसभा सदस्य पदका उम्मेदवारसमेत रहेका अध्यक्ष लालले पहिलेदेखि भइरहेको जेनेरेसनलाई लक गर्ने काम गठबन्धनले गरेको आरोप लगाए ।
उनले भने, ‘यसलाई हामीले तोड्नै पर्छ, उनले भने, ‘यही चुनौतीलाई स्वीकार गरेर मैदानमा उत्रेको छु । म मात्र बाचुन्जेल नेतृत्वमा रहन्छु, मलाई मात्र भोट दिनु पर्छ भन्ने मानसिकता बोकेका असफल बूढाहरु लोकतन्त्रमा नाकाबन्दी गर्ने षडयन्त्र गरिरहेका छन् ।’
उनले आफूहरुले लोकतन्त्र र बहुदलीय व्यवस्थाको निमित्त संघर्ष गरेपनि अहिले बहुदलीय व्यवस्थामा लोकतन्त्रको घाँटी रेट्ने काम भइरहेको आरोप लगाए ।
उनले ‘राजनीतिक दलहरुलाई अघोषित प्रतिबन्ध लगाउने काम भइरहेको छ । मैले बोल्ने हिम्मत गरेको छु । तमलोपाले साहस गरेको छ । तपाईंहरुको आशिर्वाद र समर्थन जरुरी छ’ भने ।
उनले भने,‘आफूलाई प्रभावशाली भन्ने नेताहरु किन रोजगार, खेती, शिक्षाको कुरा गर्दैनन् ? यिनीहरु महज सरकारमा जाने रट लगाइरहन्छन् ।’
