खोजवाणी संवाददाता
एजेन्सी, असोज ५
पाकिस्तानको निर्वाचन आयोगले आउँदो जनवरी मसान्तमा आम चुनाव गर्ने घोषणा गरेको छ ।
पाकिस्तानको निर्वाचन आयोग (ईसीपी)ले एक विज्ञप्ति जारी गर्दै बहुप्रतिक्षित निर्वाचन जनवरीको अन्तिम सातामा हुने जनाएको हो ।
यसका लागि तिथिमिति भने तोकिएको छैन ।
घोषणा भएको समयमा निर्वाचन भए करिब १२ करोड ७० लाख मतदाताले पाँच वर्षको कार्यकालका लागि नयाँ सरकार चयन गर्न मतदान गर्ने आयोगले जनाएको छ ।
प्रधानमन्त्री अन्वारुल हक कक्कडको नेतृत्वमा अन्तरिम सरकारले ९ अगस्टमा राष्ट्रिय सभा भनेर चिनिने तल्लो सदन विघटन गरेपछि सरकार सञ्चालन गर्दै आएका छन् ।
राष्ट्रपति आरिफ अल्वीले निवर्तमान प्रधानमन्त्री शहबाज शरिफको सल्लाहमा राष्ट्रिय सभा भंग गरेका थिए । त्यसपछि संवैधानिक व्यवस्थाअनुसार ९० दिनभित्र राष्ट्रिय चुनावका लागि मतदानको बाटो खुलेको थियो ।
निवर्तमान सरकारले असारमा निर्वाचन नियमावलीमा संशोधन गर्दै निर्वाचन आयोगलाई स्वतन्त्र रूपमा निर्वाचनको मिति घोषणा गर्ने अधिकार दिएको थियो ।
प्रधानमन्त्री र प्रदेशका मुख्यमन्त्रीहरू मिलेर बनेको संवैधानिक परिषद्ले गत महिना नयाँ राष्ट्रव्यापी जनगणनाको विवादास्पद नतिजालाई अनुमोदन गरी तोकिएकै समयमा निर्वाचन नहुने निश्चित गरेको छ ।
जारी गरिएको विज्ञप्तिमा उल्लेख भएअनुसार निर्वाचन आयोगलाई पछिल्लो जनगणना अनुसार देशमा नयाँ निर्वाचन क्षेत्र घोषणा गर्न कम्तिमा चार महिना लाग्ने छ ।
निर्वाचन आयोगले सेप्टेम्बर २७ मा प्रारम्भिक निर्वाचन क्षेत्र सार्वजनिक गर्ने भएको छ । यस सूचीमा दलहरुले दाबी विरोध गर्न पाउने छन् । त्यसपछि आयोगले सच्याएर नोभेम्बर ३० मा निर्वाचन क्षेत्रको अन्तिम सूची सार्वजनिक गर्दै प्रकाशित गर्ने जनाइएको छ ।
