खोजवाणी संवाददाता
सर्लाही, मंसिर ५
सर्लाहीमा स्कुल बसले एक विद्यार्थीको ज्यान लिएको छ ।
नवलपुर–मलङ्गवा सडक खण्डअन्तर्गत सर्लाहीको हरिपुर नगरपालिका वडा नम्बर ८ स्थित जुटपानीमा आज अपरान्ह स्कुल बसले किच्दा एक विद्यार्थीको मृत्यु भएको छ ।
जिल्लाको लालबन्दी वडा नम्बर १ स्थित नवलपुरमा रहेको जेआइसी बोर्डिङ स्कुलको बसले किचेर सोही विद्यालयको एलकेजीमा अध्ययनरत हरिपुर नगरपालिका वडा नम्बर ८ घर भई लालबन्दी नगरपालिका वडा नम्बर २ मा बस्ने वीरेन्द्र पासवानका ६ वर्षीय आदित्य पासवानको मृत्यु भएको हो ।
सो दुर्घटनामा गम्भीर घाइते हुनुभएका बालक आदित्यलाई उपचारका लागि स्वाभिमान अस्पताल बर्दिबास लैजाँदा चिकित्सकले मृत घोषणा गरेको इलाका प्रहरी कार्यालय हरिपुरले जनाएको छ ।
यता स्कुल बस र बस चालकलाई इलाका प्रहरी कार्यालय लालबन्दीले नियन्त्रणमा लिएको सर्लाही प्रहरीले जनाएको छ । गम्भीर घाइते बालकलाई उपचारका लागि विद्यालयकै बसमा राखेर बर्दिबास लगिएको थियो ।
प्रत्यक्षदर्शीले जनाएअनुसार बालकलाई ओरालेर अगाडि बढ्नेक्रममा बसले बालकलाई किचेको थियो ।
यता आक्रोशित स्थानीयवासीले दुर्घटनापछि जुटपानीमा नवलपुर–मलङ्गवा सडक अवरुद्ध पारेका छन् ।
यता सडक खुलाउनका लागि आक्रोशित स्थानीयवासीसँग प्रयास भइरहेको सर्लाहीका प्रहरी उपरीक्षक प्रवीण धितालले जनाएका छन् ।
