खोजवाणी
जनकपुरधाम ।
जनकपुरधामदेखि भारतको अयोध्यासम्म सञ्चालन हुने रेल सेवा सञ्चालन अझैसम्म पनि अन्योलमै रहेको छ ।
भारतका प्रधानमन्त्री नरेन्द्र मोदीले आफू तेस्रो पटक प्रधानमन्त्री बनेको एक सय दिनको अवसर पारेर जनकपुरधाम–अयोध्या रेल सञ्चालन गर्ने तयारी रहे पनि नेपालबाट त्यसमा ध्यान नदिदाँ अन्योलमा परेको छ ।
नेपाल रेल्वे कम्पनी लिमिटेडका महाप्रबन्धक निरञ्जन कुमार झाले जनकपुरधाम–आयोध्याबीच रेल सेवा सञ्चालनका लागि आन्तरिक तयारी भइरहेको जानकारी दिए । दुवै देशको बीचमा एकदुई पटक भर्चुअल बैठकसमेत भएको जनाउँदै उनले अब भौतिक उपस्थितिमा एउटा बैठक बसेपछि सोबारे निर्णय हुने दाबी गरे ।
महाप्रबन्धक झाले रेलको रुट, दररेट, सुरक्षालगायतका विषयमा नेपालको तर्फबाट भारतलाई प्रस्ताव गरिसकेको बताए ।
भारतको अयोध्याबाट गोरखपुर हुँदै नरकटियागंज, रक्सौल, सीतामढ़ी, दरभंगा, जयनगर हुँदै जनकपुरधामसम्म रेल आइपुग्ने जनाइएको छ ।
टिकट दरको विषयमा नेपालको तर्फबाट जयनगरदेखि अयोध्यासम्म रहेको दर नै कायम गर्ने प्रस्ताव गरिएको उनले बताए । यसबारेमा भारतबाट कुनै जवाफ अहिलेसम्म आएको छैन । सातामा एक दिन चलाउने सो रेल सेवाका लागि सुरक्षाको व्यवस्थाबारे पनि टिुंगो लागेको छैन । चाँडै नै दुई देशबीच रेल्वे सेवाका अधिकारीहरूको बैठक बसेर सबै विषयको टुंगो लगाउने र रेल सेवा सञ्चालनमा ल्याइने महाप्रबन्धक झाले बताए ।
जनकपुरधाम–अयोध्या रेल सेवाको उद्घाटन दुवै देशका प्रधानमन्त्रीले गर्ने सम्भावना रहेको महाप्रबन्धक झाको भनाइ छ ।
रेल्वे कम्पनीका अनुसार प्रत्येक शनिबार जनकपुरबाट १ः३० बजे अयोध्याका लागि रेल प्रस्थान हुनेछ । सो रेल आइतबार बिहान चार बजे अयोध्या पुग्नेछ । सो दिन दिनभर सो रेल त्यहीँ रहने छ भने सोमबार बिहान पाँच बजे त्यहाँबाट जनकपुरधामका लागि प्रस्थान गर्ने कम्पनीले जनाएको छ ।
अयोध्यादेखि जनकपुरधामसम्म चल्ने रेलमा २० वटा डब्बा हुनेछ । त्यसमा एसी क्लासदेखि स्लिपर र जनरल डब्बाको व्यवस्था रहने जनाइएको छ ।
जनकपुरधाम–जयनगर रेल्वेको उद्घाटन २ अप्रिल २०२२ मा भएको थियो । दुवै देशका प्रधानमन्त्रीले संयुक्त रूपमा दिल्लीबाट त्यसको उद्घाटन गरेका थिए । अहिले त्यसलाई साप्ताहिक रूपमा भए पनि अयोध्या–जनकपुरधाम गरिने भएको छ । त्यसपछि दिल्ली–जनकपुरधामसम्म रेल सेवा चलाइने तयारी रहेको छ ।
दिल्लीबाट पर्यटक लिएर ‘भारत गौरव’ एसी रेल जनकपुरधाम आउने सम्भावना रहेको छ । भारतीय सञ्चारमाध्यमले जनाएअनुसार असोज ६ गते भारतको दिल्लीबाट सो रेल जनकपुरधामका लागि हिँड्ने कार्य योजना रहेको छ ।
तर यसको आधिकारिक पुष्टि हुन बाँकी रहेको महाप्रबन्धक झाले बताए । उनले भने, ‘मैले पनि यो कुरा सुनेको हुँ तर आधिकारिक पत्र भने अझैसम्म पनि आइसकेको छैन ।
